سنی من هاردا آختاریم؟/اسدالله امیری
سنی من هاردا آختاریم؟
تیلیم خان گدیگینده ایچدیگین جام دا می آختاریم سنی؟
یوخسا اوردا ائشیتدیگین مقدس بیر مکاندان گلن سسده می آختاریم سنی؟
یوخسا سندن یادگار قالان تورکمان محمود دا می آختاریم سنی؟
بیر گون اوزومو سنین، تک وورغونون سانیردیم، آمما ایندی بوتون ائللر وورغونون سنین.
اوشاق ایکن ییرلرین آتامدان ائشیدنده هئچ ده دوشونمه دیم:
فقل اللهم رب العالمین
سویله نه دیلده سن بیر دیلله شه لیم
صلاحیت جعفر یا ولاالضالین
سویله نه دیلده سن بیر دیلله شه لیم...(تیلیمین ۱۲ دیل آدیندا شعری)
سونرا پاشالاردا گوردوگوم آشیق علی رمضانی، ساوا شهرینده قوردوغو استریو تیلیم منی بیر آز اوزومه گتیردی. داها سونرالار آشیق اسماعیل شاهمرادی اوخودوغو ۵ کاسئتی اورمییه اونیورسیته سینه هدیه ائدنده اوزومه گووه ندیم. سنی علی کمالی داغ به داغ، داش به داش، ائو به ائو،مرغئی، قاراقان بند امیر، لوک دینگه سی، جین دره سی، همدان، ساوا، قوم، زنجان، تبریز، آزربایجان، تورکیه و ارمنستاندا آختارارکن، منده کمالینی آختاردیم. وارلیقی ایزله دیم. وارلیغیمی وارلیقدا تاپدیم. آمما حئییف ۱۳۷۵ ده سنی تاپاندا کمالینی ایتیردیم. کمالی دن سونرا دوکتور گونئیلی وارلیقدا یازدیغی بیر مقاله دن دیوانین چاپ اولماسینین نده نینی ، شعرلرینین بیر سیراسی باشقا شاعیرلرین شعرلری ایله قاتیشیق اولدوغونو اویره ندیم.
سنی آختارماغا دوام ائتدیکجه، قوجا تبریزده اختر نشریاتی یایان بیر کیتاب منه بویوک بیر موشتولوق اولدو. "تیلیم خان حیاتی و یارادیجیلیغی". کمالی و زهتابی نین سسی تبریزدن گلدی. تبریز ساوانی یانسیدی.
"تبریز اوستو گونئی دی" ییرینی اوخویارکن دوکتور گونئیلینی تاپیب و دیوانین بیرینجی جیلدی یئنه تبریزین گونئیلیسی الی ایله چیخدی. بیرینجی جیلدین چیخماسی منیم دوغوم گونومه راست گلدی. من یئنی دن دوغولدوم. کیتابدان سونرا هر یئردن سسیمه سس وئرن اولدو. شیرازدان ماذون، تورکمن صحرادان مختومقولو، تیکمه داشدان خسته قاسیم،دوخارخاندان عابباس، باهاردان ریضا و ... سنی قارشیلادی. بیر آزی دا گیلئی لندی. تبریزین مقبره الشعرا کیتابخاناسی سنی قوناق ائتدی و منی خوشحال. سنی آختاراندا مراغه و سرسکند آراسیندا نظر کهریزی شهرینین آتش بیک منطقه سینده بیر کندی تاپدیم، بو کندین آدی تیلیم خان.
مرندلی بیر دوستا شعرین اوخویاندا دئدی کی: بو شعری آتام اوخویاردی و تخلصوندا تیلیم دئییردی، آمما بیلمیردی تیلیم کیمدی و هارالیدی.
سنی آختارماغا دوام ائده جه یم، بوتون ائلیم له.
آه اگر علی کمالی اولسایدی... .
( بو یازی حکیم تیلیم خان ۵ ینجی قورولتاییندا -۲۶/۴/۸۷ ده- اوخوندو).
