حکیم تئلیم خان`ین مزارداشی

حکیم تئلیم خان`ین مزارداشی 85/5/13 ده مره‌غئی کندینده کند آغ ساققال‌لاری‌نین تشببوثی ایله و تئلیم خان`ین شئعرلری اوزره چالیشان مهندس امیری به ‌یین ایش بیرلی‌یی‌ایله یئنی‌له‌نیب‌دیر.

مزار داشینین متنی:

بیله ن‌لر بیلسین‌لر من تئلیم‌خان`ام
بیلمه‌یه‌نلر بیلسین گؤوهره م، کانام
مره‌غئی ساکینی اصلی تورکمانام
گزه گزه بو جهاندان گلیره‌م

تئیمور خان اوغلو
حکیم تئلیم خان

دوغوم ایلی: 1126 گونش ایلی (ه.ش)
اؤلوم ایلی: 1209 گونش ایلی (ه.ش)

اؤلکه‌میز عیراقدیر شهریمیز ساوا
مزله‌قان چاییندان گؤتوردوم هاوا
عاشیقلار دردینه ائیله ره م داوا
من طبیبه م، هیندوستاندان گلیره‌م

تئلیم خان وئبلاگی بوتون تئلیم خان وورغونو اولان مره‌غئی اهالیسیند‌ن تشکكور ائدیر.

من موریده م سن منه پیر، تئلیم‌خان

آدین داغیلیب‌دیر جومله جهانه

عاشیق علی رمضانی «گونش»

باش گؤتوروب آیاغی‌یا گلمیشه م
من موریده م سن منه پیر، تئلیم‌خان
ازل گوندن سنی اوستاد بیلمیشه م
من موریده م سن منه پیر، تئلیم‌خان

هر یئرده سن هئچ دوشمه‌ره‌ی دیلیمدن
اوخویارام هر نه گلسه الیمدن
بولبوله م آیریلدیم سن تک گولومدن
من موریده م سن منه پیر، تئلیم‌خان

آدین داغیلیب‌دیر جومله جهانه
سؤزلرین ائشیده ن اولور دیوانا
شئعرلرین بیر یازیلایدی دیوانا
من موریده م سن منه پیر، تئلیم‌خان

موریدلرین سالدی قبرین داشینی
هامی تؤکدو گؤزدن حسرت یاشینی
گونش وئره‌ر سنه جان-و باشینی
من موریده م سن منه پیر، تئلیم‌خان

من هر زامان گلسه م مزارین اوسته
اللریمده گتیریره‌ره م گول‌دسته
ازلدن اولموشام سنه ديل‌بسته
من موریده م سن منه پیر، تئلیم‌خان

آی منیم آلینماز قالام تئلیم‌خان

سلیمان نوراللهی

مندن سنه اولسون سلام تئلیم‌خان
آی منیم آلینماز قالام تئلیم‌خان

آنا یوردون سنین مزله‌قان چایی
شاهسوه ن ائلینه سالیبسان هایی
کیمه آللاه وئریب سن کیمی پایی
گلمیشه م عطریوی آلام تئلیم‌خان
آی منیم آلینماز قالام تئلیم‌خان

قبریوین گؤروره م پوزغوندور داشی
باخدیقجا گؤینویوز اوره‌ییم باشی
مین‌ یئرد‌ن تؤکولور گؤزومون یاشی
ايذن وئر یانیندا قالام تئلیم‌خان
آی منیم آلینماز قالام تئلیم‌خان

غوصصه‌لر قلبیمی گتیریب درده
قوی سؤزون اوستوند‌ن گؤتوروم پرده
مظلوملارین قانی قالیبدیر یئرده
گره ک او قانلاری آلام تئلیم‌خان
آی منیم آلینماز قالام تئلیم‌خان

اوستاد تئلیم‌خان`ين ايکي شئعري

قوم-ساوه آشیق موحیطينده حتتا زنجان، سولدوز، خوراسان كيمي دیگر ايران تورک آشیق موحیطلرینده اوستاد تئلیم‌خان3 آدلي تورک اوزاني آشیقلارين پيري، اوستادي قبول ائديلمکده‌دير. بوتون آشیقلار اونون شئعرلریني ازبر بيليرلر. اوستاد تئلیم‌خان`ين (تئليم خان، 1742 - 1829) ايکي شئعري:

محممد

ازل حاق نوروندان قودرت قلمین
یازدی عرش-ي موعللایا محممد
کوفرون گونو يانديريردي عالمی
شوکور آللاه سالدي سايه محممد.

منع ائديب باطيلي حاققی بويوران،
حلالی حرامدان سئچيب آييران،
بوتلاري سينيديريب منبر قئييران،
قدم باسان موصللایا محممد.

بو تخته، بو تاجا تبارک اللاه،
ايبراهيم ده سالدي کعبه بئيتوللاه،
موسا تور’دا، کيليسادا روحوللاه،
ميندي گئتدي او سمايا محممد.

عرشدين بوئيانيندا کلام-ي رواج
ملکلر باشیندا نور دورور تاج
دؤردونجو آسماندا گئتدي وئردي باج،
انگوشترین یدواللاها محممد.

عاريف بيله ر بو کلامي بو ديني،
اوخورلار حق کيتابيندا ياسيني،
يارب اولور باخا قييامت گونو،
تئليم کيمي بینوايا محممد.

شئیخ-ي صنعان

شئیخ ـ ی صنعان کيمي ترسا سئوميشه م،
راستا يوللاريمي کئج ائیله‌میشه م.
بير ناخلف کسه دوچار اولموشام،
باشیمنان عاقليمي نئجه ائیله‌میشه م.

ضرر اولوب، ائله‌ديييم ائتديييم،
کاساد اولوب بازارلاردا ساتدیغیم،
الدن چيخيب تور آتديغيم توتدوغوم،
قوودوغوم جئيراني نئجه ائیله‌میشه م.

بير وفا گؤرمه‌ديم سولطاندان خاندان،
بير تيکان چيخاردان اولمادي جاندان،
قونشولاريم کؤچوب اويان باياندان،
آراليق ائويمي اوج ائیله‌میشه م.

آللاه بيلير نه قده ر پاکام آري‌يام،
نئجه بخت -ی قارا شوم سيتاره‌یه م،
مٶحنت املاکينين دروگری‌یه م،
دريب غم خرمنين دج ائیله‌میشه م.

اله نمیشه‌م يوز مين يوز مين الکد‌ن،
چيخميشام من نئچه شطط-ی کلکه‌ن
خبر آلسان مني چرخ-ي فلکدن،
دئيه‌ر تئليم’ينه‌ن لج ائیله‌میشه م.
“