تئلیم`د‌ن بو سؤزلر نیشانا قالیر
شئعر: تئلیم خان
گؤنده‌رن: عاشیق گونش
ساقی دولدور ایچیم جامی مستانا
گئده ر مئی ایچه نلر مئیخانا قالیر
کئچه‌ر بو دونیانین یاخشی یامانی
قالسا بیر یاخشی‌لیق اینسانا قالیر
یامان گونده دوستون آلار یانینی
گلیب گونده خبر آلار حالینی
قوجالاندا اوغلون توتار الینی
قالسا بیر یاخشی‌لیق اوغلانا قالیر
خریدار اولمادی دئمه سؤزونو
هر ناکسه وورماگینان اوزونو
دلی دؤولت‌لی‌یه وئرمه قیزینی
مال-و دولت گئده ر، دیوانا قالیر
آدام اوغلو جبری گلمز حیسابا
میراثخورلار اوچون دوشه ر عذابا
حریصلر بایقودور دونیا خرابا
بایقو اوچوب گئده ر ویرانا قالیر
مین «جو»وا وئرمه ره م «دو»-و «سه پنج»ی
کیم ییغا دؤولتی کیم چکه رنجی
گئده ر دؤولت - مردین دؤولت-و گنجی
تئلیم`د‌ن بو سؤزلر نیشانا قالیر
